ທ່ານ ຮອງລັດຖະມົນຕີ ໄດ້ສະແດງຄວາມຂອບໃຈຕໍ່ອຳນາດການປົກຄອງ, ເຂດປົກຄອງຕົນເອງເຜົ່າຈ້ວງກວາງຊີຈວງ ແລະ ສຳນັກເລຂາທິການອາຊຽນ ທີ່ໄດ້ຈັດກອງປະຊຸມສົນທະນາຄັ້ງນີ້ຂຶ້ນ. ທ່ານໄດ້ກ່າວວ່າ RCEP ໄດ້ປ່ຽນແປງພູມສັນຖານເສດຖະກິດຂອງພາກພື້ນ, ສ້າງໂອກາດໃໝ່ໆ ເພື່ອການເຕີບໂຕ ແລະ ຄວາມຈະເລີນຮຸ່ງເຮືອງຮ່ວມກັນໃນໄລຍະ 4 ປີທີ່ຜ່ານມາ ແລະ ຍັງໄດ້ເນັ້ນໃຫ້ເຫັນວ່າ RCEP ເປັນຂອບຮ່ວມມືທີ່ສຳຄັນ ທີ່ຊ່ວຍຫັນວິໄສທັດຂອງ ສປປ ລາວ ຈາກປະເທດທີ່ບໍ່ມີຊາຍແດນຕິດຈອດທະເລ ໃຫ້ກາຍເປັນສູນກາງການເຊື່ອມຈອດທາງບົກ, ເຊື່ອມຕໍ່ຄອບຄົວອາຊຽນກັບບັນດາຄູ່ຮ່ວມເຈລະຈາ. ຜົນປະໂຫຍດທີ່ສຳຄັນປະກອບມີ:
• ການຄ້າຂະຫຍາຍຕົວ: ການຫຼຸດຜ່ອນພາສີແບບຂັ້ນໄດ ແລະ ກົດລະບຽບວ່າດ້ວຍແຫຼ່ງກຳເນີດສິນຄ້າແບບສະສົມ ໄດ້ຊ່ວຍໃຫ້ການສົ່ງອອກຂອງລາວ ໄປຍັງປະເທດຄູ່ຮ່ວມສັນຍາ RCEP ເຕີບໂຕຂຶ້ນຢ່າງຫຼວງຫຼາຍ, ໂດຍສະເພາະໃນຂະແໜງກະສິກຳ, ແຜ່ນແພ ແລະ ສິນຄ້າປຸງແຕ່ງ.
• ຂັ້ນຕອນສິນຄ້າແບບງ່າຍດາຍ: ລະບຽບການທາງພາສີທີ່ລຽບງ່າຍຂຶ້ນ ໄດ້ຊ່ວຍຫຼຸດຜ່ອນຕົ້ນທຶນການເຮັດທຸລະກຳ, ໃນຂະນະທີ່ມາດຕະຖານທີ່ສອດຄ່ອງກັນ ກໍຊ່ວຍເພີ່ມຂີດຄວາມສາມາດໃນການແຂ່ງຂັນຂອງສິນຄ້າລາວ.
• ສົ່ງເສີມ SME: ບັນດາວິສາຫະກິດຂະໜາດນ້ອຍ ແລະ ກາງ (SME) ຂອງລາວ ມີໂອກາດເຂົ້າຮ່ວມໃນລະບົບຕ່ອງໂສ້ມູນຄ່າຂອງພາກພື້ນໄດ້ດີຂຶ້ນ, ຊຶ່ງຊ່ວຍສ້າງວຽກເຮັດງານທຳ ແລະ ສ້າງຂີດຄວາມສາມາດໃນການພັດທະນາແບບຍືນຍົງ.
ນອກຈາກນີ້, ການເຈລະຈາເຂດການຄ້າເສລີ ຈີນ-ອາຊຽນ ສະບັບ 3.0 ທີ່ສຳເລັດໄປເມື່ອບໍ່ດົນມານີ້ ຍັງເປັນອີກບາດກ້າວສຳຄັນທີ່ສົ່ງເສີມຂອບການຮ່ວມມືຂອງ RCEP, ຊຶ່ງສ້າງພື້ນຖານອັນແຂງແກ່ນໃຫ້ແກ່ການເຊື່ອມໂຍງເສດຖະກິດທີ່ເລິກເຊິ່ງຍິ່ງຂຶ້ນ.
ໃນຕອນທ້າຍ, ທ່ານ ຮອງລັດຖະມົນຕີ ໄດ້ຢືນຢັນຄືນຄວາມມຸ່ງໝັ້ນຂອງ ສປປ ລາວ ຕໍ່ຄວາມສຳເລັດຂອງ RCEP. ສປປ ລາວ ສະໜັບສະໜູນຂໍ້ລິເລີ່ມໜານໜິງທັງສາມຢ່າງຢ່າງເຕັມທີ່ ແລະ ຈະສືບຕໍ່ເຮັດວຽກຮ່ວມກັນ ເພື່ອປັບປຸງກົດລະບຽບ ແລະ ມາດຕະຖານຂອງ RCEP ໃຫ້ດີຍິ່ງຂຶ້ນ. ທ່ານໄດ້ກ່າວປິດທ້າຍດ້ວຍສຸພາສິດລາວທີ່ວ່າ “ເຮັດດີໄດ້ດີ” ເພື່ອສະແດງເຖິງຈິດໃຈຂອງການຮ່ວມມື ເພື່ອຜົນປະໂຫຍດຮ່ວມກັນ ແລະ ຄວາມຮັບຜິດຊອບເຊິ່ງກັນ ແລະ ກັນ.
ໂດຍ: ຄະນະບັນນາທີການຂ່າວສານ ອຄ